来海石库门，不论是过节，平常里阿是一样个，啥人家老人过寿，要烧交关大排骨面送到左邻右舍屋里八大家吃，要是要好点个邻居就不谈了，哪怕包了一点荠菜馄饨，要是咪道老好，也会端一碗过去，要是乡下头带来土特产，一定会的分一点过去尝鲜。要是有老人突然生病，才会的主动去背去驮帮忙送到医院里去。有一句闲话叫远亲不如近邻，要是住过石库门就会有得亲身感受。

金宝住了淮海路妇女用品商店后头的石库门房子里，平常里去读书总归有同学叫了一道去，放学格点人再一沓路上白相回来。比较要好个同学有小金，小军，阿亮，阿敏，玲玲，皮蛋，强巴等。小金住了四明里，房间对牢沧浪亭后门，天天可以看到有人拿一大筐一大筐切好个香葱倒进大油镬里，眼睛里只看到香葱在油锅里翻滚到金黄色，尼朵里只听到刺啦啦刺啦啦个声音，等到声音小了，香味道一记头喷出来，闻到之财吐水也会得流出来。沧浪亭个葱油拌面就是闻闻香，实际上么啥好吃。小金人不长，身体扎足，一直来了南昌路少体校训练，金宝也去训练过，吃不起苦就退出了。小金一直坚持训练，中学还么毕业就招得去当空军飞行员。过了几年，金宝么事体荡淮海路，兜进一爿店看到伊来了当营业员，就问伊，哪能辣么生头就回来了，也不打声招呼。伊搁着老难为情，拿金宝拖了旁边，悄悄的讲，真不好意思，我不瞒侬，侬不要帮伊拉去讲。后头叫我去试飞，一些些落特一部，一些些落特一部，趟趟上去就像头吊了裤裆里，哈得我魂灵阿么了，有天子训练不巧拿韧带拉断特了，只好复员回来，金宝凑近伊尼朵问，侬成心个对伐，小金不语。

阿敏住了培文公寓，就是现在上海妇女用品商店楼上，听伊讲过伊拉住个房子以前是孔祥熙的家当。房间里是钢窗打蜡地板，窗口头看下去就是淮海路。阿敏平常里老文静，大家来了一道白相她也参加的，但交关晨光是陪了傍边看，等到大家白相了吃力了，会得从袋袋里摸出点零食来分分，同学道理最大方个就是伊。

皮蛋因为是姓卞再叫伊皮蛋，住了淮国旧贴隔壁的小弄堂里，当时淮国旧个名气老响，抄家来个红木家什，各种稀奇古怪个么事才会的来海淮国旧里头看到，尤其是红木家什，后门的马路上堆成山一样。当时要是买一点，现在就发财了，可惜没人买。皮蛋虽然长的高大，有点刚噱噱个，时常被人家欺负。金宝欢喜兜淮国旧，学生子么钞票，看看稀奇么事阿老开心，兜一圈看好了就弯到隔壁寻皮蛋白相一些晨光，然后再回去。

强巴的差号出自于一部电影，讲西藏农奴翻身的，里头有个奴隶就叫强巴，吃相难看来西帮伊长了老像，所以叫伊强巴。强巴是个捣蛋巨，平常里打相打，打弹子，刮豆腐夹子样样来赛，皮管皮，老讲义气，只要同学被欺负，伊第一个会去出头。对自家的爷娘阿老好，来海弄堂里白相，只要爷娘一叫，手里白相么事剁特就回去。

弄堂里白相个么事金宝也是样样会，帮同学一道白相老有劲，伊最欢喜个并不是打弹子刮豆腐夹子，而是会的去做另外一桩事体。金宝的隔壁住了一个四类分子，么事体就会得被拎出来斗一斗，到里弄里回报思想改造，到小小班去认识错误。金宝看伊作孽，平常里会得去帮伊做点小事体，天热乘风凉会得帮伊吹吹牛皮，四类分子来了么人个晨光会得讲点故事八金宝听。有一天下半天，金宝姆妈烧了点山芋汤当点心，上头撒了点糖桂花，香喷喷，金宝看看也吃不光，盛了一碗端八四类分子吃，四类分子开心煞特了，对金宝讲，小元宝先坐特一些，让我吃好侬再回去。然后边吃边和金宝谈山海经，过了一些放低声音，我帮侬讲，那现在的文化叫啥文化，那个种小人才要八伊拉害煞特了。侬欢喜看书伐？金宝答，欢喜个。以前我帮侬讲个故事才是书里写过个，看书要比我讲的扎劲。我可以借八侬看，但是侬不好讲八人家听，否则我又要被批斗了。金宝答，好个。然后只看到伊不晓得从阿里个角落头里抽出一本旧书，卷起来要金宝抗抗好再回去，再拿碗溏了溏，拿两只鸡蛋放了空碗里让金宝带回去。

金宝回到屋里厢，趁么人打开一看，是一本发黄的《喻世明言》，直版本，繁体字，看了几页真萨度，繁体字交关不识，拿新华字典放了傍边，有种字根本翻不出来，只好猜，尽管越看越萨度，但越看越有咪道，越看越想看。等到一本看光，偷偷交钻到隔壁掉一本再看，小学四年级能够看过《啼笑因缘》这种禁书，来了伊拉一辈里基本么个。来海这段晨光，金宝看了交关书，特别是《水浒》，只有半本，看了肚肠痒煞么办法，过了好几年开放了，金宝姆妈排队去帮伊买了一本，如获至宝，总算看完了整本。

金宝和四类分子成了忘年交，四类分子高兴个晨光会得讲一点风俗习俗，有趟子讲到过年请财神，伊讲，现在个人才是阿无乱冒充金刚钻，懂么才不懂个，财神可以滥请啊，一顿子炮仗放好就算请财神了，财神不八伊拉哈了逃特再怪来。小元宝，我教教侬喏。求财有得求正财帮偏财，请财神也是有请正财神帮偏财神。正财神也叫文财神，凡事才要讲道理，讲信誉。比如讲，浙商老嘎伐，伊拉请个财神是范蠡，徽商也老结棍个，伊拉请个财神是管仲，其他我忘记特了，侬书里去查一查。偏财神就是武财神，道理讲不过就动刀动枪，关公就是武财神，拿子把大刀专门捞偏财个，赵公明因为文武双全，两边才可以请个。

请财神是要有规矩个，屋里厢先要摆块地方八财神蹲，然后拿吃个么事供好招待财神，再要点香烛磕头，初五是财神生日，生日蛋糕不八人家吃么，蜡烛点一根呀，啥么事阿没个，就晓得噼里啪啦放炮仗，侬讲好笑伐。