派錢本來人人歡迎，但香港特區政府派卻畀人鬧……確係世間少有，喂，有永久居民身份證就收一萬喎，幾好吖，乜香港人咁唔領情呢？原來按照立法會審批預算案程序，撥款係要整體審批嘅，一份預算案內，警察係大贏家，獲發258億，大過其他紀律部隊嘅總和，人事編排由三萬人增加至三萬八千人，撥款用來買防暴設備諸如此類，泛民選民梗係感冒啦。一位80後話畀左丁山知，佢嘅年輕群組嘅成員收入唔算高，收一萬元好有用，但見到派錢得與預算案整體綁埋一齊，為之把鬼火，超過一半群組成員話情願唔要，一於同警察一拍兩散。

左丁山早已講過反修例運動演變成警民互恨，警媒互憎（注意，呢度媒體係指記者，媒體老細唔知同警方建制派幾friend，鄧炳強聽講不時同一啲老總飲茶食飯㗎），令到警察民望大降。有藍絲群組廣推加拿大智庫Fraser Institute選出香港警察為全世界優良紀律部隊嘅資訊，猛咁講，又埋怨主流傳媒唔報導，甚受冤屈咁款。左丁山問過與Fraser Institute熟悉嘅人士，呢單係乜料，佢地話由於搜集數據資料需時，加上政府或民間發佈嘅調查通常滯後，所以該智庫到2019發表之排名（例如自由經濟之類），一般都係基於一年半至一年前嘅所得資料去推算。2019世界警察排名所用嘅資料大部份係2017年嘅。

2017之時，林鄭還未搞彎香港，當時警民關係良好，警察民望甚高，點可以同2019年嘅實際情況比較呀，試睇吓2021年之排名，藍絲到時未必笑得落。

香港警察之民望，兩年之內跌至谷底，其中理由唔駛多講，但係聽烽煙節目嘅市民意見，真係有人情願唔要一萬元都要泛民盡力阻止警察撥款，先知道「警民互恨」幾難了結。鄧炳強吹捧多幾次成龍，只會推低佢個人聲望。

派一萬（左丁山原則上係反對派錢嘅，已講過多次）如果真係要市民高興，其實可以特事特辦，（林鄭講到慣啦），將總派款項放入抗疫基金（林鄭已加碼過三次），由財委會快速通過，於新財政年度（4月1日後）從速派放，到時預算案未通過，永久居民已可以收錢啦。特區政府實際上係要玩政治，意圖將派錢時間拖長之政治責任，歸咎於泛民拉布反對警方撥款，目的十分明顯。未來一個月，藍絲文宣機器發動，線上線下會有大把文字／聲音狂罵泛民阻住市民收錢。林鄭整個政治士碌架畀泛民嘆，梗係九月立法會選舉策略之一啦。

左丁山
電郵 :mcwriter@appledaily.com