暴徒係咁將暴力升級，由遊行、掟磚升級到意圖「謀殺」，盲反派政客、媒體「始終如一」，堅定支持暴徒暴行；佢哋呢幾個月嘅招數都好簡單，就係將所有責任推卸俾政府、警方，而暴徒不但「無錯」，而且係為香港抗爭嘅「義士」。今日廣男睇《生果報》，發現佢哋嘅專欄作家李怡將呢種「卸責精神」推到極致，佢竟然想攞恐怖組織ISIS（伊斯蘭國）同港府、警察作比較，甚至稱「ISIS公開他們要進行的恐怖活動，事後也毫不隱瞞，不像港共政權及警方，做了又不認，謊話連篇」；言下之意，李怡係咪想講港府、警察比ISIS更恐怖呢？

先搞清楚事實吧！

李怡嘅謬論，恕廣男唔喺度一一細錄喇，如果大家有興趣，可以睇返佢今日喺《生果報》刊登、題為〈世道人生：比六四更邪惡〉嘅文章。對於李怡嘅「偉論」，大家首先要請教下李怡，當佢攞ISIS同港府警察比較嘅時候，李怡係咪唔知道，香港之所以亂到今天，係因為不斷有暴徒破壞，打砸搶燒甚至想「謀殺」他人，點解佢唔講下啲暴徒做過乜，而一味攻訐有必要執法嘅警方呢？就以呢幾日發生嘅事為例，襲警行為李怡唔提下？恐襲港鐵李怡唔提下？私刑暴打市民李怡又唔提下？有人俾兇徒淋易燃液體兼火燒李怡都唔提下？李怡所講嘅ISIS，其實係咪另有所指呢？

李怡的筆比暴徒更恐怖

廣男就覺得，以李怡嘅視野、水平以至留意新聞嘅程度，佢無可能唔知啲暴徒做過咩「好事」，佢之所以唔理班暴徒做乜，而一味攻訐港府、警察，其實離不開三大原因，第一係無論暴徒有幾暴力，佢作為盲反派一分子，都要為暴徒暴行開脫；第二，《生果報》以至佢本人嘅任務，根本就係要散播仇恨，令人「仇警」，唔係仲點有人出嚟反政府；第三，亦都係最恐怖嘅一點，就係李怡講咁多歪論，似乎係想其他人認同暴徒嘅暴力行為，感覺就好似「如果唔係因為政府咁，班示威者（暴徒）又駛乜咁做呀？」。好多時候，「有筆」在手嘅人，往往比暴徒更恐怖，令人更心寒。

睇李怡呢篇文，仲有個幾有趣嘅地方值得商榷，就係李怡喺文卓尾段提到「新冷戰」，稱「這新冷戰怎麼就如此詭異地讓一個小小的香港 … 去與一個力量懸殊的強權抗爭呢？」其實呢，成日提「新冷戰」嘅，好似係《生果報》老闆黎智英喎，李怡咁講，係咪連佢都想串黎智英「比喻不倫」呢？如果係，不妨講白啲喇！ 

作者 聶廣男